O grupo municipal do BNG critica o «despropósito» dos plenos municipais «que vai en aumento» e para o que proporán unha modificación do Regulamento de funcionamento Orgánico do Concello de Ourense.
Os concelleiros do BNG compareceron para criticar as situacións vividas nos últimos plenos do concello de Ourense a anunciar a presentación de varias iniciativas para corrixir esta situación.
O BNG critica o «despropósito» dos plenos
«Xa no pasado mes de xuño falamos das nosas liñas de actuación nos vindeiros catro anos e levamos meses traballando na modificación do Regulamento. Entendemos que o funcionamento do Concello non está sendo adecuado e que está na nosa man modificar esta ferramenta que debera actuar en favor da participación e do debate e non servir aos intereses de quen nese momento estea no poder», indicou a concelleira Erea Blanco.
O portavoz municipal do BNG, Luís Seara, destacou que Pérez Jácome «ten a dirixir o Pleno como se dun tirano se tratase e a dificultar o lexítimo dereito da Oposición a exercer a fiscalización e o control á acción de Goberno agora deu un paso máis, coartando competencias atribuídas ao propio Pleno».