As Festas da Pequena en Padroso de Sarreaus xa teñen completo o programa de actividades para os catro días de celebración.
A veciñanza é a principal protagonista duns festexos nos que todo o pobo participa activamente para dar forma a un evento de gran valor social.
Festas da Pequena en Padroso de Sarreaus
As festas de calquera localidade supoñen un momento do ano no que se comparten momentos de lecer e diversión. O habitual é contratar diversas agrupacións e gozar das distintas actuacións como espectadores pero en Padroso non son así.
Na localidade de Padroso, os veciños organizan, actúan, participan e gozan da programación feita por eles e para eles. A carreira popular, o bingo do chupito, Galas internacionais dos pequenos e adultos, a actuación da Padroso Band ou a foto anual son algúns dos acontecementos que figuran no cartel de 2024.
Desde o 8 ó 11 de agosto de 2024, Padroso terá unha intensa actividade na que a convivencia veciñal será o principal ingrediente das Festas da Pequena.
