O subdelegado do Goberno en Ourense, Eladio Santos, celebrou esta mañá en Petín que un total de 75 proxectos de 52 municipios ourensáns se beneficien das axudas para implantar a tecnoloxía 5G.
“Buscamos garantir a igualdade de oportunidades e a calidade de vida nas vilas pequenas”, asegurou Santos.
Ourense amplía a cobertura 5G en 75 zonas rurais
O subdelegado destacou que esta iniciativa fortalece a conectividade nas zonas rurais da provincia.
No encontro coa alcaldesa de Petín, Raquel Bautista, celebrado na Casa do Concello, Santos explicou que o programa UNICO 5G – Redes Activas leva a conectividade móbil de última xeración ás áreas rurais mediante o financiamento de equipamentos activos e infraestruturas auxiliares.
Na provincia de Ourense, o Goberno destina 4,7 millóns de euros para apoiar estes proxectos. Só na comarca de Valdeorras, conseguiron financiamento 10 emprazamentos distribuídos entre os concellos de A Veiga (tres), Carballeda, Larouco, Petín, A Rúa, Rubiá, O Bolo e Vilamartín.
As axudas están dirixidas exclusivamente a concellos de menos de 10.000 habitantes. O obxectivo é dotar ao rural das infraestruturas necesarias para a vida cotiá e frear o despoboamento. “Unha vez máis, reafirmamos o compromiso do Goberno de España coa loita contra o despoboamento do rural”, insistiu o subdelegado.
Estas medidas buscan reducir a fenda dixital e combater o reto demográfico, completando outras iniciativas xa en marcha desde 2020. As catro convocatorias do programa UNICO – Banda Ancha permitiron investir máis de 24 millóns de euros en Ourense. Isto permitiu levar fibra óptica a 5.492 vivendas na comarca de Valdeorras.