O Concello de Ourense recibiu da Xunta de Galicia unha comunicación na que require a prohibición permanente do baño ou, en alternativa, recomendar á cidadanía que non se bañe nas pozas do Muíño da Veiga.
Esta medida, transmitida pola Consellería de Sanidade, baséase en que as pozas non cumpren cos requisitos para seren declaradas zona de baño, debido ás características de funcionamento e á orixe da auga.
Ourense busca manter o uso das pozas do Muíño da Veiga
A nova foi tratada este mércores nunha xunta de portavoces convocada polo alcalde de Ourense, Gonzalo Pérez Jácome. O alcalde trasladou aos representantes dos catro grupos municipais a súa intención de dialogar coa Xunta para buscar unha solución.
Todos os grupos coincidiron en que é preciso explorar vías para garantir que as pozas do Muíño da Veiga continúen abertas ao público. Todos os grupos valoraron a súa excepcionalidade e a importancia que teñen para a cidadanía e para os visitantes.
O Concello destaca que este espazo termal é un dos principais atractivos turísticos e de lecer da cidade, moi valorado tanto polos residentes como polos turistas.
Por iso, confía en que a Xunta reconsidere a súa posición e se chegue a un acordo que permita manter o uso destas emblemáticas pozas.
