O servizo de autobuses urbanos do Concello de Ourense continúa marcando rexistros históricos.
No mes de xuño de 2025 contabilizáronse 608.816 viaxeiros, o que supón un incremento do 7,8% respecto ao mesmo mes de 2024, cando se rexistraron 564.930 validacións.
Ourense superará os 7 millóns de viaxeiros en autobús urbano en 2025
A tendencia ascendente mantense tamén se se compara con xuño de 2023 e 2022, con subidas do 10,2% e do 33,9% respectivamente.
Este ritmo de crecemento fai prever que a cidade superará amplamente os 7 millóns de viaxeiros durante o presente ano. Para o goberno local, estes datos “mostran o éxito do servizo de autobuses municipais: os números falan por si sós”.
Desde o executivo municipal sinalan tres factores principais que estarían detrás deste incremento:
- A renovación da frota en 2023, coa incorporación de 40 novos vehículos, dos cales 10 son eléctricos.
- As tarifas entre as cinco máis baixas de todas as cidades españolas.
- A optimización de liñas e frecuencias, como nas rutas 5 e 6 e noutras catro máis.
A previsión é que a cifra de pasaxeiros siga aumentando no futuro inmediato, grazas á posta en marcha de novas liñas durante o verán e á posible implantación da gratuidade do servizo ao longo de 2026, “sempre que o pleno municipal non a obstaculice”, matiza o goberno local.
O Concello defende que o aumento sostido do número de usuarios demostra a boa xestión do servizo: “Igual que sucede cunha empresa privada, a fidelización e captación de máis clientes é o mellor indicador do éxito. Estas cifras desmontan as críticas da oposición, xa que este goberno conseguiu máis usuarios que os anteriores executivos do PP, PSOE ou BNG”.