¿Que facemos cos quioscos que foron retirados das rúas de Ourense? Podemos darlle unha segunda vida para que continúen formando parte do mobiliario urbano?
O goberno municipal de Ourense retirou nos últimos anos os quioscos que estaban situados en distintos puntos da cidade e trasladounos ó Parque Botánico de Montealegre.
¿Que facemos cos quioscos?
Para o grupo municipal do PSdeG-PSOE, o goberno de Ourense debería buscar unha nova utilidade para estes quioscos e non acumulalos nun entorno natural. Alba Iglesias, concelleira do PSdG-PSOE en Ourense lamenta «unha estampa que da moita pena ao ver como se converte nun vertedoiro este espazo».
A retirada destes quioscos contrasta coa intención dos socialistas que solicitan ó alcalde, Gonzalo Pérez Jácome, a restauración e recuperación dos mesmos. Entre as propostas para un novo uso dos quioscos estaría un punto de recollida e entrega de paquetería, caixeiros automáticos, cargadores para vehículos eléctricos ou quiosco rexentado por algunha asociación do ámbito social como sucede na Coruña coa Asociación Down.