A localidade ourensá da Arnoia prepárase para vivir unha das citas máis esperadas do verán: a XLVI Festa do Pemento.
Esta festa celebrarase os días 1, 2 e 3 de agosto de 2025 cun completo programa de actividades gastronómicas, culturais e musicais.
A Arnoia celebra a XLVI Festa do Pemento
A Festa do Pemento da Arnoia 2025 volve con forza para homenaxear o produto estrela da comarca: o pemento de Arnoia.
O programa arrinca o venres 1 de agosto ás 21:00h coa recepción de autoridades e a inauguración oficial, acompañada polo Grupo de Gaitas Airiños da Arnoia. A continuación acenderanse os fogóns para a tradicional fritura dos pementos.
O pregón estará a cargo de Alfredo Dourado, vocalista e director do grupo A Roda, que tamén ofrecerá un concerto no recinto da festa ás 22:45h. A noite continuará coa verbena da Orquestra Espectáculo Panorama, que actuará en dúas quendas, e o DJ Mario.
O sábado 2 de agosto comezará ás 10:30h coa concentración de vehículos clásicos «A Arnoia», que desfilarán ata o recinto da festa. Desde as 12:15h, volverá a fritura dos pementos, amenizada pola Charanga Bandiños Band, e pola tarde celebrarase unha gran festa infantil na área recreativa do Inquiau con xogos, festa da escuma e olimpiadas.
Ás 21:00h terá lugar o IX Festival de Pandeireteiras “Arnoia Viva”, con grupos como Celavella, Queixume dos Pinos, Airiños da Arnoia e O Forrollo & Feitizo de Pau. A verbena correrá a cargo da Orquestra Charleston Big Band e a Disco Móbil MVP, que se alternarán ata altas horas da madrugada.
O domingo 3 de agosto volverán os fogóns desde primeira hora. Ás 12:30h celebrarase a misa e ofrenda dos froitos da terra, coa participación da Coral Cantores de Arnoia. A música continuará coa Charanga CLK, tanto ao mediodía como pola tarde. O broche final porao a actuación da Dr. Slump Banda, grupo especializado en versións, ás 23:00h.
A XLVI edición da Festa do Pemento promete unha fin de semana inesquecible na Arnoia, unindo tradición, gastronomía e música nun ambiente único.