Esta mañá presentouse oficialmente en Expourense EXPOFAMILIA 25, a Feira da Saúde e o Benestar na Familia, que se celebrará os días 13 e 14 de setembro no recinto feiral ourensán.
O acto contou coa presenza de representantes institucionais e da organización. Estes resaltaron a importancia de consolidar este evento como referente en Galicia e no norte de España.
EXPOFAMILIA 25 chega a Ourense con máis de 50 actividades familiares
O evento conecta ás familias con profesionais dos ámbitos sanitario, educativo e do benestar nun formato innovador, participativo e inclusivo.
Entre os intervinientes estiveron:
- Santiago Álvarez González, Director Territorial da Consellería de Política Social e Igualdade;
- María Teresa Barge Bello, Deputada de Igualdade da Deputación de Ourense;
- Tamara Silva Cid, Concelleira de Educación e Xuventude do Concello de Ourense;
- Mary Salgado Atanes e Tania Cardenal Mera, representantes do equipo organizador; e
- Rogelio Martínez González, Director Xerente de Expourense.
Durante a presentación subliñouse que EXPOFAMILIA é “moito máis que un evento: é un espazo de encontro real entre familias e profesionais, un lugar de respecto, aprendizaxe e alegría, no que todos os modelos familiares teñen cabida”.
A feira ofrecerá máis de 50 actividades pensadas para todas as idades. Inclúense charlas e obradoiros sobre saúde e crianza, zona multideporte, espazo musical, obradoiros en familia, área de expositores e zonas dedicadas a asociacións e entidades sociais.
Como novidade nesta edición, crearase o Espazo de Diálogo: Maternidade Real. Este espazo será un coloquio entre nais que compartirán experiencias reais da maternidade, coas xornalistas e actrices María Mera e Raquel Atanes. Entre os ponentes destacados tamén se inclúen Carlos González, pediatra especializado en crianza respectuosa; Armando Bastida, enfermeiro pediátrico e divulgador; e Sara Desirée Ruiz, educadora social e autora sobre adolescencia.
EXPOFAMILIA 25 conta co patrocinio de Igual de Buenas e Carlin Xinzo. Tamén conta coa colaboración da Xunta de Galicia e da Deputación de Ourense, o que permite ofrecer unha feira diversa e chea de experiencias para todas as familias.
As entradas están dispoñibles en viveitx.co, cun prezo a partir de 17,90 €. Esta entrada dá acceso a todas as actividades, espazos infantís e servizos de conciliación.