O alcalde de Ourense, Gonzalo Pérez Jácome, recibiu esta mañá no salón de plenos ó equipo organizador do Magosto Cultural de Castro de Beiro.
Este evento, considerado o magosto asociativo máis lonxevo da cidade, celébrase de maneira continuada desde 1983, con única pausa durante a pandemia.
O Magosto Cultural de Castro de Beiro celebra 42 anos de tradición
Baixo o lema “Antes ca nós ninguén”, a asociación cultural e veciñal de Castro de Beiro prepara a edición deste ano, que terá lugar o martes, 11 de novembro.
Esta edición contará con dúas modalidades:
- Magosto tradicional, no que os asistentes poderán levar a súa propia comida, e
- Magosto alternativo, cun menú composto por polbo, churrasco, chourizo, crioulo, pan, viño, auga, sobremesa, café e castañas por 18 euros, previa inscrición.
A xornada incluirá tamén a actuación musical de Os Afinantes. Tamén haberá sorteos e unha homenaxe a un destacado colaborador da festa, símbolo do espírito comunitario que mantén viva esta tradición.
A programación do 42 aniversario do Magosto Cultural de Castro de Beiro estenderase ata o 30 de novembro, con charlas, proxeccións audiovisuais e un acto especial de recoñecemento á Banda de gaitas da localidade.
Ese día, coincidindo coa celebración de Santo André, patrón de Castro de Beiro, terá lugar a clausura das actividades cunha xornada festiva acompañada dun viño galego.