O BNG de Ourense mantén desde xaneiro a petición da listaxe de compatibilidades concedidas ao persoal municipal para exercer unha segunda actividade.
Na Xunta de Área celebrada esta mañá, o portavoz nacionalista, Luís Seara, advertiu que, se en dez días non reciben a información reclamada, acudirán ao Xulgado en defensa dos seus dereitos como oposición.
Seara denuncia opacidade e avisa de accións legais do BNG
Na reunión da Xunta de Área de Administración Xeral, Loxística, Seguridade e Mobilidade, na que tamén se aborda persoal, Seara insistiu unha vez máis nunha documentación que, segundo lembrou, “o Goberno local leva meses negando con excusas”.
O BNG considera que esta actitude impide o acceso á información obrigatoria que corresponde aos grupos da oposición.
“O Goberno local vulnera os nosos dereitos como Oposición á hora de ter información e xa estamos fartos de recibir escusas continuamente”, afirmou o portavoz. Engadiu que “se non hai nada que ocultar, non entendemos por que se nos nega a información”, polo que advertiu ao concelleiro delegado que, transcorrido o prazo de dez días, o grupo recorrerá á vía xudicial.
Preguntas sobre o procedemento da discoteca Desörden
Na Xunta de Área de Urbanismo, o BNG pediu de novo acceso a expedientes xa solicitados e presentou unha batería de preguntas sobre o proceso seguido arredor da reapertura da discoteca Desörden (antiga Macao), na rúa Valle Inclán.
Os nacionalistas queren saber por que caducaron os expedientes de reposición da legalidade e de revogación da licenza, malia estaren tramitados e pendentes unicamente de resolución; por que se agardou a que a nova xerencia presentase documentación que permitiría o sobresemento; e que prevé facer o Goberno local ante as denuncias veciñais por ruidos.
Tamén cuestionan como é posible autorizar obras no interior do local estando pendente un expediente urbanístico con orde de precinto, e se o Concello realizará medicións de ruído con técnicos municipais.
Atrasos no programa Xantar na Casa
Na Xunta de Área de Servizos Sociais, o BNG reclamou explicacións sobre o atraso na sinatura da adenda co Goberno galego para ampliar o número de persoas usuarias do programa Xantar na Casa. Segundo a resposta do Executivo local, a Xunta non asinou a ampliación debido ás débedas do Concello de Ourense correspondentes ao ano 2015, que seguen sen liquidarse.
Conflito na Praza de Abastos nº 1
O BNG tamén trasladou preguntas sobre a situación da Praza de Abastos nº 1. Quixeron saber se o Goberno local aceptaría o plan funcional elaborado polas praceiras e praceiros, mais a resposta foi negativa. Para o BNG, esta postura evidencia que o Goberno de Jácome pretende expulsar ao comercio tradicional e sacar a xestión do mercado a unha nova licitación.