O Premio Literario Carlos Casares de microrrelatos 2025 xa ten vencedora. A estudante Nerea Paz Martínez, do IES Lagoa de Antela de Xinzo de Limia, logrou o primeiro premio coa obra “Tras do solpor”, un texto no que, segundo o xurado, destaca a intensidade narrativa e a capacidade de suxestión.
O xurado tamén salientou o traballo de Iker Domínguez Porto, do IES Carlos Casares de Viana do Bolo, que quedou como finalista co microrrelato “Todo cambia”.
Nerea Paz, gañadora do Premio Carlos Casares 2025 de microrrelatos
Ademais, concedeuse un accésit a María Fernández García, tamén do IES Carlos Casares, pola súa peza titulada “O xardín de Antía”.
Dende a organización transmitiron os seus parabéns aos tres autores nobeles, que destacan polo talento creativo e pola calidade das súas propostas literarias.
A entrega oficial dos premios celebrarase na tradicional Gala Literaria, prevista para a tarde do sábado 29 de novembro no Salón Nobre do Liceo de Ourense. A velada contará coa actuación do trío Divisi Ensemble, integrado por Martín González, Cecilia Rodríguez e Roi Lago, e estará conducida por Marina Sánchez.