O Concello de Ourense fai un chamamento á colaboración das persoas condutoras para respectar os límites de velocidade na cidade.
Na madrugada do pasado 21 de novembro, ás 00:00 horas, comezaron a funcionar os novos cinemómetros instalados polo Concello en varias rúas da cidade.
Pena Trevinca dispara as multas: o Concello pide prudencia
Na actualidade están operativos cinco radares fixos e un móbil, todos eles coa capacidade de sancionar as infraccións detectadas. Nos vindeiros días incorporaranse dous máis, completando así a rede municipal de control de velocidade.
As primeiras análises deixan claro que Pena Trevinca é o punto máis problemático. Nesta rúa, onde o límite está fixado en 30 km/h segundo a normativa estatal, estase rexistrando o maior número de excesos de velocidade. O Concello lembra ademais que se trata dunha zona especialmente sensible pola presenza dun centro educativo.
O goberno municipal pide ás persoas condutoras que extremen a atención ao circular por esta vía e que adapten a velocidade ao sinalizado, lembrando que a finalidade dos radares non é recadar, senón previr accidentes.