O Concello de Ourense revisará a normativa municipal que regula a concesión de vaos para garaxes, co obxectivo de rebaixar a superficie mínima esixida para obter estas autorizacións.
Na actualidade, para conceder un vao permanente requírense 100 metros cadrados libres, unha cifra que o goberno local considera “excesiva e non xustificada”, segundo explicou esta mañá o alcalde, Gonzalo Pérez Jácome.
O Concello de Ourense reducirá a superficie mínima para conceder novos vaos
Na súa intervención, o rexedor sinalou que este límite “non ten sentido porque impide que haxa máis vaos en Ourense e, polo tanto, dificulta unha maior calidade de vida para a cidadanía”. Por este motivo, o Executivo municipal traballa nunha modificación á baixa desta superficie mínima.
O alcalde destacou que a intención é facilitar a creación de novos espazos de aparcamento en divisións horizontais dos edificios e revalorizar o patrimonio inmobiliario da veciñanza. “Trátase de dar máis facilidades para que a xente poida dispoñer de máis aparcamentos e aproveitar mellor os espazos urbanos”, apuntou.
A revisión normativa incluirá tamén os criterios que afectan aos vaos permanentes dos garaxes comunitarios e aos vaos laborais, co fin de actualizar por completo unha regulación que o Goberno municipal considera desfasada e pouco adaptada ás necesidades actuais da cidade.