A nova pasarela peonil da OU-150 en Cudeiro bota a andar tras a visita esta mañá do delegado territorial da Xunta en Ourense, Manuel Pardo, quen confirmou o inicio das obras, cun investimento autonómico que supera os 435.000 euros.
Segundo explicou o delegado, a intervención desenvólvese á altura do punto quilométrico 1+000 da estrada OU-150, nunha zona onde o paso actual sobre o rego Val dos Gozos presenta un notable estreitamento de calzada.
Cudeiro contará cunha nova pasarela para reforzar a seguridade viaria
O obxectivo é garantir unha circulación peonil máis segura, mediante unha infraestrutura independente da ponte existente.
Pardo enmarcou esta actuación no Plan de Sendas da Xunta. Este programa xa planificou e executou 300 km de itinerarios peonís e ciclistas en toda Galicia, reforzando a súa aposta pola mobilidade sostible e segura. O delegado destacou tamén que os Orzamentos da Xunta de 2026 reservan 263 millóns de euros para seguir ampliando estas infraestruturas. Incluirán un investimento récord de 71,6 millóns destinado á conservación da rede autonómica de estradas.
“Traballamos para que as persoas poidan desprazarse de forma segura, saudable e plenamente integrada na contorna”, salientou Pardo. O delegado subliñou a importancia da integración paisaxística nas obras que se acometen nos distintos concellos.
Unha estrutura de máis de 54 metros
A nova pasarela peonil contará cun pórtico de aceiro de canto variable, distribuído en dous vans: un principal de 35,35 metros e outro de 18,85 metros, alcanzando unha lonxitude total de 54,20 metros. A sección transversal deixará 2,50 metros transitables, configurados mediante barras tubulares en celosía.
O proxecto incorpora tamén a construción de dous estribos con muros de protección de 20 centímetros de espesor, así como muros de coieira de ata 2 metros de altura para conter as terras dos accesos. A pila central elevarase ata os 3,74 metros, combinando un pedestal de formigón e un sistema de tubulares metálicos.