Os orzamentos da Deputación de Ourense para 2026, aprobados hoxe e cifrados en 110,475 millóns de euros, inclúen finalmente 2,75 millóns adicionais propostos polo PSdeG-PSOE, que optou pola abstención tras constatar a inclusión da maioría das súas demandas.
O voceiro socialista, Álvaro Vila Araújo, destacou que esta incorporación confirma que “o traballo serio, rigoroso e construtivo da oposición logra resultados palpables”.
Os socialistas suman 2,75 millóns ao orzamento provincial de Ourense para 2026
Segundo Vila, o PP aceptou practicamente todas as propostas socialistas, por seren “razonables, viables e necesarias para os concellos da provincia”.
CooperOU sobe a 21 millóns e reforzo do Plan de Vivenda
Un dos acordos máis relevantes é o incremento da partida variable do Plan CooperOU, que engade 2 millóns máis ao millón xa previsto e ascende así a 21 millóns de euros en 2026, o 19% do orzamento provincial. O executivo comprometeuse, ademais, a aprobar esta ampliación mediante unha modificación de crédito específica, evitando mesturar estes fondos con partidas discrecionais. Para Vila, trátase dunha “vitoria para os 92 concellos da provincia”, especialmente os máis pequenos.
Outro dos puntos negociados foi o reforzo do Plan Provincial de Vivenda, que pasa de 500.000 a 1.200.000 euros. O Grupo Socialista sostén que esta medida permitirá ampliar o parque público de vivenda nos concellos rurais. Tamén permitirá facilitar novas actuacións de adquisición e rehabilitación de inmobles destinados a aluguer social.
Tamén se incorpora a súa proposta de aumentar os fondos para os cinco conservatorios profesionais de música. Estes pasan de 40.000 a 50.000 euros por centro, situando a partida total en 250.000 euros. Vila subliñou que estes recursos reforzan instalacións, instrumentos e programación cultural, e puxo o foco no papel estratéxico da formación musical na provincia.
Compromisos sobre o Inorde e crítica socialista á “vitimización” do PP
Os socialistas tamén arrancaron ao goberno provincial o compromiso de compartir o informe técnico para a disolución do Inorde, aprobada en pleno en 2024, así como a elaboración dun cronograma formal para integrar a súa actividade e persoal na estrutura da Deputación. Vila advertiu que vixiarán que “as palabras se convertan en feitos”.
Durante o pleno, a vicepresidenta Marta Novoa acusou ao Goberno de España de dificultar a xestión provincial pola ausencia de Orzamentos Xerais do Estado. Vila replicou esta postura e criticou a “estratexia de vitimización constante” do PP, lembrando que a Deputación dispón de autonomía e dun orzamento suficiente para executar políticas propias.
Abstención estratéxica e oposición útil
O PSdeG-PSOE mantivo críticas ao carácter “continuísta” das contas, á falta de políticas transformadoras e á ausencia dun plan específico para a reconstrución tras os incendios de agosto. A abstención, explican, busca recoñecer as melloras introducidas e subliñar o papel dunha oposición útil, orientada a resultados concretos para a cidadanía.
O PP rexeita a moción socialista contra o transfuguismo grazas ao voto de calidade de Menor
O pleno tamén rexeitou a moción do PSdeG-PSOE contra o transfuguismo político, unha iniciativa apoiada polo BNG e por dous deputados de Democracia Ourensana. A ausencia do alcalde de Ourense, Gonzalo Pérez Jácome, provocou un empate que obrigou ao presidente provincial, Luís Menor, a exercer o seu voto de calidade, o que permitiu ao PP tombar a proposta.
O voceiro socialista lembrou que a moción censuraba a participación do PP nunha operación en Manzaneda, onde se impulsou unha moción de censura apoiada en dous edís elixidos nas listas do PSdeG-PSOE. Vila acusou aos populares de “vulnerar o Pacto Antitransfuguismo”, ao que a Deputación se adheriu por unanimidade en 2021.
O PSdeG-PSOE denuncia que o PP “desacredita” a xestión municipal de Manzaneda para “encubrir” unha operación coordinada para acceder á alcaldía mediante tránsfugas e critica que o voto de calidade de Menor sirva para “amparar prácticas contrarias aos principios democráticos”.