O evento “Nadal entre irmáns”, organizado pola Asociación de Colombianos de Ourense coa colaboración do Concello, celebrará este domingo 7 de decembro no Campo da Feira unha xornada festiva que divulgará as tradicións do Nadal en Colombia e Venezuela.
A proposta inclúe gastronomía, música en vivo e actividades culturais, e conta con entrada gratuíta.
Colombia e Venezuela celebran o Nadal en Ourense cun evento aberto ao público
Desde as 12.00 horas e até a noite, o recinto ofrecerá 14 postos de gastronomía tradicional colombiana e venezolana, ademais de 5 expositores de persoas emprendedoras.
O público poderá participar en actividades propias destas celebracións, como o acendido de velas, xogos tradicionais, un coro infantil e diversas actuacións musicais. Esta celebración tamén inclúe a Los Coleguitas, Latinshow, Santiago Cely, Keyla Guerra e un DJ.
O salón de plenos acolleu esta mañá a presentación. Na mesma participación o alcalde, Gonzalo Pérez Jácome, a presidenta da Asociación de Colombianos de Ourense, Rina Dayana Rolong, xunto con Sandra Hoyos Godoy e María de los Ángeles Moreno.
As representantes destacaron que a iniciativa pretende abrir unha xanela ás tradicións destes países e crear un espazo de convivencia. “Celebraremos o Nadal típico de Colombia e Venezuela, con actividades como o acendido de velas, que é unha tradición moi especial nestas datas nas que chega a esperanza. Haberá comida típica, festín, música… Queremos compartir o Nadal entre irmáns”, explicaron. Engadiron que a festa mesturará música colombiana e música local, animando a toda a veciñanza de Ourense a participar.
A organización recalca que será unha gran oportunidade para coñecer, degustar e compartir a cultura destes países nun ambiente familiar e festivo.