Ourense impulsará novos aparcamentos soterrados para aumentar de forma significativa o número de prazas de estacionamento en diferentes zonas da cidade.
O anuncio realizouno esta mañá o alcalde, Gonzalo Pérez Jácome, quen detallou as catro liñas de traballo que está a desenvolver o goberno municipal.
O Concello de Ourense ampliará o estacionamento con catro novos aparcamentos soterrados
Segundo explicou o rexedor, o obxectivo é mellorar a mobilidade urbana, facilitar o estacionamento e optimizar o uso do espazo público en barrios con alta densidade de tráfico e demanda de prazas.
Un dos proxectos máis avanzados é o do Parque Canedo. O novo aparcamento soterrado estará operativo a finais de 2026, incrementando as prazas dispoñibles nunha área estratéxica da cidade.
No barrio do Couto, o Concello prevé construír un aparcamento soterrado na rúa Salvador Dalí. Con máis de 300 prazas, estenderase desde o Pavillón dos Remedios ata a rúa Ervedelo. O goberno local xa ten redactado o anteproxecto e prevé licitar na próxima primavera un concurso para adxudicar a redacción do proxecto, a execución das obras e a súa explotación.
Outra das actuacións previstas sitúase na rúa Pardo de Cela, dentro do anteproxecto de soterramento da Praza de Concepción Arenal. Este contempla a creación dun aparcamento fronte ao Pavillón dos Remedios con preto de 200 prazas.
Por último, o goberno municipal encargará a redacción dun anteproxecto para a construción dun aparcamento soterrado en San Francisco. Será concretamente na confluencia da rúa Pena Trevinca coa rúa da Coruña, co fin de reforzar o estacionamento nesta zona do casco urbano.
Desde o Concello subliñan que estas actuacións forman parte dunha estratexia global de mobilidade destinada a modernizar as infraestruturas e dar resposta ás necesidades actuais da cidade.