Ourense dará a benvida ao calendario deportivo de 2026 coa celebración da 33ª Subida á Costiña de Canedo.
Esta é unha cita emblemática que terá lugar o 1 de xaneiro e que marca, un ano máis, o inicio oficial das actividades deportivas na cidade.
Ourense abre o ano coa Subida á Costiña de Canedo
A presentación oficial da proba tivo lugar esta mañá no Salón de Plenos do Concello de Ourense. O acto contou coa participación do alcalde, Gonzalo Pérez Jácome, xunto aos concelleiros Aníbal Pereira e Armando Ojea, que acompañaron a Saturnino González Novoa, organizador e impulsor histórico desta iniciativa.
A Subida á Costiña de Canedo celebrarase o xoves 1 de xaneiro de 2026, con saída ás 12:30 horas. Está concibida como unha actividade aberta a toda a cidadanía, sen límites de idade e con posibilidade de participar a pé ou en bicicleta. Un dos seus sinais de identidade é a ausencia de inscrición previa, o que facilita unha participación espontánea e popular.
O percorrido, cunha lonxitude de 3,3 quilómetros, discorrerá desde a boca do túnel ata a igrexa de Castro de Beiro. Manten o trazado tradicional que caracteriza esta proba. Durante a presentación, Saturnino González Novoa definiu a carreira como un auténtico “autotest”, ao converterse no primeiro reto físico e persoal do ano para moitas persoas participantes.
Unha vez completado o ascenso, a organización ofrecerá a habitual recepción festiva na contorna da igrexa de Castro de Beiro, con chocolatada e champaña, nun ambiente de convivencia, deporte e celebración para brindar polos bos desexos do novo ano.
Datos da actividade
- Data: 1 de xaneiro de 2026
- Hora: 12:30 horas
- Percorrido: 3,3 km (boca do túnel – igrexa de Castro de Beiro)
- Inscrición: gratuíta e sen rexistro previo