Ourense non irá a Fitur este ano por decisión do goberno municipal, segundo confirmou o alcalde, Gonzalo Pérez Jácome.
Este cualificou a Feira Internacional de Turismo como “unha trampa” e “un dispendio de recursos humanos e económicos”.
Ourense non irá a Fitur por ser “irrelevante”
O rexedor asegurou que a cita madrileña “é irrelevante” e que non ten incidencia real no turismo, nin positiva nin negativa. Na súa intervención, defendeu que a cidade leva anos acadando máximos históricos de visitantes e pernoctas sen participar neste evento.
Segundo explicou, este será o quinto ano consecutivo no que o Concello de Ourense non acode a Fitur. Nese período, apuntou, o turismo medrou de forma notable, tanto en número de viaxeiros como en estancias, un aumento que vinculou tamén á incorporación de máis de 600 pisos turísticos na cidade.
Pérez Jácome definiu Fitur como un evento “endogámico”, no que as cidades presentan as súas propostas no pavillón de Galicia ante un público composto maioritariamente por persoas coñecidas. “O gran público non asiste, así que non ten sentido facer esas presentacións”, afirmou.
O alcalde tamén criticou o papel da Xunta de Galicia, ao considerar que Ourense é discriminada neste tipo de accións promocionais. Como exemplo, lembrou que “o último ano que fomos a Fitur, coincidindo coa chegada do AVE a Ourense, o lema da caseta autonómica era ‘Ven a Santiago’. Foi unha broma”.
Promoción alternativa
Desde o goberno municipal deféndense outras fórmulas de promoción turística, máis acordes cos hábitos actuais da cidadanía. “Hoxe chégase á xente doutra maneira”, sinalou, poñendo como exemplo os vídeos promocionais das termas protagonizados por Noa Rouco ou Omar Montes, que acadaron millóns de visualizacións. “Deron a coñecer o nome de Ourense se cadra mil veces máis que Fitur”, subliñou.
Por último, Pérez Jácome destacou a relevancia de eventos consolidados como o Entroido, “que cada ano vai a máis”, así como a importancia do boca a boca para que Ourense siga gañando posicións como destino turístico sen necesidade de acudir á feira madrileña.