Barbadás reforza o programa CER para colonias felinas en 2026 tras a reunión mantida esta semana polo tenente alcalde Daniel Rey con parte do voluntariado encargado da xestión das colonias de gatos no municipio.
O encontro serviu para fixar os obxectivos deste 2026 e para escoitar as demandas e necesidades do equipo que participa no programa CER (Captura, Esterilización e Retorno).
Barbadás reforza o programa CER para colonias felinas en 2026
A Tenencia de Alcaldía, a través das áreas de Emerxencias e Protección Civil e Medio Ambiente, coordina a preto de 20 voluntarios e voluntarias. Estas persoas pertencen a diversas asociacións protectoras.
O seu labor céntrase en proporcionar alimento, esterilización e atención veterinaria ás colonias felinas existentes no termo municipal.
Desde o Concello lembran que a normativa de protección animal obriga ás administracións locais a xestionar as colonias felinas. O obxectivo é garantir unhas condicións de vida dignas para os animais e favorecer unha convivencia responsable coa veciñanza.
Daniel Rey puxo en valor o traballo desenvolvido polo voluntariado e apelou á implicación cidadá. “A veciñanza debe respectalos e axudalos, están facendo unha labor altruísta en prol do benestar animal e do cumprimento da lexislación”, asegurou o tenente alcalde. Este subliñou a importancia da colaboración social para o éxito do programa.