O Museo Galego do Entroido de Xinzo de Limia reabriu as súas portas coincidindo coas datas centrais desta celebración tradicional, segundo anunciou o presidente da Deputación de Ourense, Luis Menor.
A reapertura prolongarase inicialmente ata o mes de xuño.
Reabre o Museo Galego do Entroido en Xinzo
O presidente provincial puxo o acento nun segundo anuncio clave para o futuro destas instalacións. A Deputación de Ourense, a Xunta de Galicia e o Concello de Xinzo de Limia están a traballar na redacción dun convenio que permita manter aberto o museo durante todo o ano, garantindo así a súa actividade de forma estable.
Menor expresou a súa satisfacción tanto pola reapertura temporal como polos avances da colaboración interadministrativa. Segundo indicou, este acordo permitirá que o museo poida ser visitado en calquera momento do ano, reforzando o seu papel como espazo de referencia cultural.
O presidente da Deputación amosou tamén a súa confianza en alcanzar unha solución definitiva para un museo que, ao seu xuízo, “ben merece o Entroido, como parte da nosa identidade e tradición”, así como Xinzo de Limia, por tratarse dunha festa declarada de interese turístico internacional.
Ata o de agora, o Museo Galego do Entroido permanecía pechado ao público xeral, acollendo unicamente visitas e actividades puntuais, principalmente de centros educativos, mediante a xestión directa do Concello de Xinzo de Limia e da Deputación de Ourense.
