O Concello de Barbadás vén de anunciar que a Asociación Comisión de Festas San Bernabé A Valenzá será a encargada de organizar as Festas da Valenzá 2026, tras resolverse o proceso de selección aberto a comezos de ano.
O procedemento, cualificado como novidoso polo propio executivo local, contou finalmente con tres candidaturas, despois de que dúas das catro iniciativas que amosaran interese inicial optasen por fusionarse nunha única proposta.
A Asociación San Bernabé organizará as Festas da Valenzá 2026
A elección correspondeu a un comité de valoración presidido polo tenente alcalde, Daniel Rey, quen non participou na votación para asegurar a imparcialidade do proceso.
O órgano contou coa asistencia técnica do secretario da corporación e coa participación dun funcionario da Policía Local, outro de Protección Civil, un traballador do departamento de Cultura e un representante da Escola de Música.
O equipo avaliou diferentes aspectos das propostas, entre eles:
- Calidade artística das agrupacións musicais
- Programación de actividades deportivas e populares
- Iniciativas de carácter lúdico orientadas á dinamización social e convivencia veciñal
Segundo explicou Daniel Rey durante o proceso, unha vez adoptada a decisión notificouse ás candidaturas presentadas, abríndose o correspondente prazo de alegacións antes da publicación definitiva do resultado.
Condicións establecidas nas bases
As bases reguladoras fixaban unha serie de requisitos organizativos que deberán cumprir as festas de 2026. Entre eles:
- Celebración a fin de semana anterior ao 11 de xuño, día de San Bernabé, patrón da Valenzá.
- Finalización das actuacións musicais ás 4:30 horas o venres e sábado e ás 23:00 horas o domingo.
- Organización o día 11 do tradicional “baile da pataca” na Praza Vella.
- Instalación obrigatoria de baños portátiles nas verbenas e na contorna das atraccións infantís.
- Habilitación dun punto violeta en lugar visible para información e prevención da violencia machista.
Con esta resolución, a Asociación Comisión de Festas San Bernabé A Valenzá inicia xa os preparativos dun dos eventos festivos máis destacados do calendario do municipio, que cada ano reúne a centos de veciños e visitantes na contorna de Ourense.