As piscinas municipais da Valenzá, no concello de Barbadás, abrirán as súas portas o próximo 13 de xuño, dando comezo á tempada estival cun horario de funcionamento de 11:00 a 21:00 horas.
De cara a esta nova campaña, o Concello levou a cabo distintas actuacións de mantemento e mellora das instalacións.
Barbadás abrirá as piscinas municipais da Valenzá o 13 de xuño
Entre elas destaca o pintado do bordo do vaso grande cun pigmento especial que evita a súa decoloración. O obxectivo é mellorar a conservación da zona. Ademais, realizáronse reparacións nas lousas deterioradas e procedeuse á reposición e replantación de distintas áreas de céspede.
No apartado técnico, tamén se renovou unha das bombas do sistema de filtración, unha actuación destinada a optimizar o funcionamento das piscinas e garantir unha maior calidade da auga durante toda a tempada.
As entradas poderán adquirirse a través da aplicación habilitada para este servizo. Ademais da entrada individual, os usuarios dispoñerán da opción de contratar un abono familiar, destinado exclusivamente a núcleos familiares formados por pais e fillos.
Os fillos incluídos neste abono deberán ter 30 anos ou menos, non admitíndose outras relacións familiares nin conviventes fóra destes supostos. O Concello lembra que a detección de rexistros que incumpran esta normativa poderá dar lugar ao bloqueo do abono.
No caso dos menores, establécese que os nenos e nenas de menos de 14 anos, así como os grupos desa idade, deberán acceder ás instalacións acompañados por un titor responsable. A entrada será gratuíta para os menores de 4 anos.
A posta en marcha das piscinas municipais da Valenzá supón un dos principais atractivos do verán en Barbadás. Estas instalacións ofrecen un espazo de lecer, deporte e convivencia para centos de usuarios durante os meses de máis calor.