O Aceites Abril Voleyourense sumou un punto na terceira xornada da Superliga Feminina 2 tras caer por 3-2 ante o Tenerife Libby’s La Laguna nun encontro que se decidiu no tie-break.
O conxunto ourensán adiantouse no marcador, reaccionou no cuarto set e loitou pola vitoria ata o desempate.
O Aceites Abril Voleyourense suma un punto en Tenerife
O partido, disputado no CD Montañas de Taco, comezou cunha remontada visitante. Aínda que o equipo canario chegou a dominar por 16-10, as ourensás melloraron o seu xogo e conseguiron levar o primeiro set por 23-25.
A reacción local chegou nos dous seguintes parciais. O Tenerife impúxose por 25-14 e 25-17, aproveitando as dificultades do Aceites Abril para manter a súa eficacia ofensiva e superar o bloqueo rival.
O equipo ourensán non baixou os brazos e asinou o seu mellor set no cuarto. Cunha maior intensidade e solidez defensiva, dominou o parcial e igualou o encontro cun contundente 15-25.
No desempate, as visitantes chegaron a situarse por diante (4-5), pero o Tenerife recuperou a iniciativa e acabou pechando o partido por 15-9. Os parciais finais foron 23-25, 25-14, 25-17, 15-25 e 15-9.