A artista ourensá Cristina Pato Lorenzo foi distinguida co XIX Premio Clara Campoamor á Igualdade de Oportunidades, un galardón que recoñece o seu compromiso e traxectoria profesional en diversos eidos.
O xurado, que decidiu por unanimidade concederlle o premio, destacou que Pato “reflicte con total merecemento o espírito deste galardón”.
Cristina Pato, galardoada co Premio Clara Campoamor
A acta do xurado, que se reuniu esta mañá nas dependencias da Concellería de Igualdade, pon en valor a extensa traxectoria da galardoada. Formada no Conservatorio Municipal de Música de Ourense, ingresou con só seis anos na Real Banda de Gaitas de Ourense. Aos 18 anos publicaba o seu primeiro disco, Tolemia, converténdose na primeira muller en gravar un traballo en solitario como gaiteira en España. O seu percorrido musical levouna a obter numerosos recoñecementos, entre os que destaca un Grammy en 2017 como integrante da banda Silk Road Ensemble, ademais da Medalla Castelao no mesmo ano.
O xurado salientou que a contribución de Cristina Pato non se limita á música, senón que se estende ao eido da educación e a divulgación. Como docente e investigadora, desenvolveu un modelo de ensino que conecta as artes coas humanidades e as ciencias, colaborando con prestixiosas universidades de todo o mundo. Ademais, no 2022 publicaba a súa primeira novela, No día do seu enterro, editada por Galaxia.
O xurado do premio estivo composto por Noa Rouco Ferreira, concelleira de Igualdade, que actuou como presidenta; Stella Estrada Mosquera, de ValoReSC innovation; Milagros Sierra Gómez, da Federación Limiar; Marisol Nóvoa Rodríguez, presidenta da Confederación Empresarial de Ourense; e Elena Cid Muñoz, funcionaria da Concellería de Igualdade, quen exerceu de secretaria.
Con este recoñecemento, Cristina Pato súmase á listaxe de mulleres distinguidas co Premio Clara Campoamor, un galardón que valora o traballo en prol da igualdade de oportunidades e a loita pola visibilidade da muller en distintos ámbitos da sociedade.