A Xunta de Galicia reforza estes días as accións de recuperación nos montes afectados polos incendios en Valdeorras.
O delegado territorial en Ourense, Manuel Pardo, participou hoxe nunha xornada de voluntariado ambiental en Vilamartín, organizada por Afundación coa colaboración do Goberno galego e do concello, centrada na protección dos solos queimados mediante tarefas de mulching para evitar a erosión e impedir que as cinzas cheguen ao río Leira, punto clave de abastecemento de auga.
Xunta e voluntariado avanzan na recuperación dos montes queimados en Valdeorras
Na parroquia de San Vicente, Pardo, acompañado polo alcalde, Enrique Álvarez, insistiu na prioridade da Xunta por unha recuperación “urxente e rápida” das zonas danadas polos lumes e defendeu o papel esencial da agricultura e da gandería para manter vivo o medio rural e garantir o futuro da comarca.
Durante a visita, o delegado destacou o plan especial de voluntariado activado en outubro. Este plan, arredor de 500 persoas participaron en 22 intervencións distribuídas por doce concellos ourensáns. As actuacións centráronse na colocación de acolchados de palla e fibras de madeira en zonas de forte pendente para reducir riscos hidrolóxicos e protexer áreas naturais sensibles.
Investimentos e convenios cos concellos
A continuación, Pardo desprazouse ao concello de Rubiá, onde comprobou as intervencións destinadas a protexer as captacións de auga municipais. Alí lembrou que a Xunta asinou convenios por máis de 1,6 millóns de euros cos concellos da comarca. Estas axudas permitirán reparar infraestruturas municipais, adquirir material, cubrir gastos de limpeza, restauración ambiental e atención a persoas evacuadas.
Entre as entidades beneficiarias figuran O Barco, O Bolo, Carballeda, Larouco, Petín, A Rúa, Rubiá, A Veiga e Vilamartín de Valdeorras.
Ademais, salientou a achega de 47.000 euros para os traballos de desentullo en San Vicente de Leira, comprometidos pola Xunta a comezos de outubro.
Axudas ás vivendas e novos fondos para restauración
Na comarca concedéronse xa 34 axudas a propietarios de vivendas afectadas polos lumes, cun importe superior aos 2,2 millóns de euros. A maior parte destas axudas corresponden a inmobles situados en Vilamartín.
A maiores, o Executivo autonómico investirá máis de 1,9 millóns de euros na mellora de infraestruturas viarias, na restauración hidrolóxica e na retirada de madeira queimada na provincia, dos que 600.000 euros se destinarán directamente a Valdeorras. Tamén se asignaron máis de 400.000 euros a 19 comunidades de montes para paliar os danos forestais.
Pardo lembrou tamén que a Xunta puxo á disposición das explotacións afectadas 1,5 millóns de quilos de herba seca. Esta acción garante a alimentación do gando mentres se recuperan os pastos queimados.