Ourense recada 2.735 euros contra o cancro de mama grazas á quinta edición do partido solidario organizado pola Asociación Española contra o Cancro (AECC). O encontro disputouse no marco do Día Mundial contra o Cancro de Mama, que se celebra o 19 de outubro.
A iniciativa enmárcase na campaña anual da entidade baixo o lema ‘Tomámonolo a peito’, que busca visibilizar o que supón vivir con cancro de mama máis alá do diagnóstico e do tratamento.
Ourense recada 2.735 euros contra o cancro de mama
O encontro benéfico enfrontou ao EFF Rosalía e ao equipo Mulleres de Ourense no Campo Municipal de Oira. Convertíuse nunha nova mostra do compromiso solidario da sociedade ourensá.
A recadación total ascendeu a 2.735 euros, obtidos a través da venda de entradas, achegas de patrocinadores e colaboradores, así como da fila cero.
A contía recadada destinarase integramente a programas de investigación, prevención, diagnóstico precoz e acompañamento a pacientes con cancro de mama na provincia de Ourense, reforzando o traballo que a AECC desenvolve de maneira continuada no territorio.
O acto oficial de entrega do cheque celebrouse onte tamén no Campo Municipal de Oira. Este acto contou coa presenza de representantes institucionais, deportistas e membros da sociedade ourensá. Durante o evento, o presidente da AECC en Ourense, Germán Rodríguez-Saá, puxo en valor a relevancia destas accións solidarias. “Cada ano, este partido demostra que Ourense é unha provincia solidaria e comprometida. Grazas ao apoio de clubs, xogadoras, institucións, patrocinadores e cidadanía podemos seguir avanzando na loita contra o cancro de mama e acompañando a quen máis o necesita”.
No acto participaron responsables do EFF Rosalía, xogadoras do equipo Mulleres de Ourense, representantes da Xunta de Galicia, da Deputación de Ourense e do Concello de Ourense, ademais de concelleiras, membros da Policía Local e numerosas persoas colaboradoras.
Este evento solidario volve reafirmar o compromiso de Ourense na loita contra o cancro de mama. Permitirá impulsar accións que permiten mellorar a investigación, apoiar ás persoas afectadas e avanzar cara a un futuro sen cancro.