O CEIP Padre Crespo de Xunqueira de Ambía recibe un investimento de máis de 362.000 euros da Xunta para obras de ampliación e reforma interior.
O delegado territorial da Xunta en Ourense, Manuel Pardo, visitou o centro acompañado do alcalde, José Luis Gavilanes, para supervisar os traballos.
A Xunta inviste 362.000 euros no CEIP Padre Crespo
Segundo explicou o representante autonómico, a actuación mellora os espazos destinados ao equipo directivo e ao profesorado, renova os aseos e reforza a accesibilidade do edificio. “Queremos centros ao servizo da aprendizaxe e da convivencia, con espazos accesibles e cómodos”, sinalou, en referencia ao Plan de Nova Arquitectura Pedagóxica de Galicia.
As obras incluíron a ampliación sobre o patio cuberto para crear unha nova aula, despacho, sala de profesores e aseos, ademais dunha nova escaleira exterior. Tamén se reformaron baños na planta baixa e no edificio de aulas, onde se renovaron instalacións e se mellorou o illamento nas zonas con humidades.
Manuel Pardo destacou que estas intervencións reforzan o compromiso da Xunta coa mellora das infraestruturas educativas na provincia de Ourense.
