O Concello de Taboadela convoca o IV Certame Literario, unha iniciativa que busca fomentar a lectura e a escritura en galego entre a cidadanía, especialmente entre a mocidade.
A proposta desenvólvese en colaboración coa Biblioteca Pública Municipal e consolídase tras o éxito acadado nas anteriores edicións.
Taboadela convoca o IV Certame Literario
O certame está dirixido a mozos e mozas de entre 8 e 17 anos, aínda que tamén inclúe unha categoría para persoas adultas maiores de 18 anos, ampliando así a participación a toda a veciñanza interesada na creación literaria.
O principal obxectivo desta iniciativa é potenciar a literatura e incentivar a expresión escrita. Esta habilidade, segundo destacan desde a organización, está a perder presenza entre as novas xeracións debido ao avance das tecnoloxías dixitais.
O prazo para a presentación de relatos abrirase o 25 de marzo e permanecerá activo ata o 12 de maio. Pola súa banda, a resolución do certame darase a coñecer na semana do 17 de maio, coincidindo coa celebración do Día das Letras Galegas, unha data clave para a promoción da lingua e da cultura galega.
Desde o Concello animan á participación e subliñan que este certame pode ser un primeiro paso no camiño literario de futuros escritores e escritoras, reforzando así o compromiso local coa cultura e coa lingua galega.