A Policía Local de Ourense detivo dúas persoas durante a madrugada do domingo, 20 de setembro, por un presunto intento de roubo nunha vivenda da rúa do Ensino, no barrio do Couto.
Unha patrulla desprazouse ao lugar tras recibir un aviso sobre dúas persoas que poderían estar intentando acceder ilegalmente a un inmoble.
Dúas persoas detidas por un presunto intento de roubo nunha vivenda en Ourense
Unha muller de 24 anos foi interceptada nas inmediacións, mentres que un home de 26 anos fuxiu por patios interiores e edificios próximos.
Os axentes localizaron danos en accesos e ventás, así como varias ferramentas que poderían ter sido utilizadas para forzar entradas, entre elas unha panca, un martelo e varios destornilladores. Tamén se recuperaron varias tarxetas bancarias, cuxa procedencia será investigada.
O segundo implicado foi localizado na rúa Xesús Soria, agochado nunha zona elevada xunto a unha cheminea. Pola dificultade do lugar foi necesaria a intervención dos Bombeiros de Ourense. Tras aproximadamente media hora de mediación cos axentes, o home accedeu a baixar de forma segura.
As dúas persoas foron detidas e non se rexistraron danos persoais. Unha delas foi trasladada preventivamente para unha valoración sanitaria.
Recuperada unha chaqueta tras un presunto furto
A segunda intervención produciuse o sábado, arredor das 11.50 horas, nun establecemento comercial do centro da cidade. A Policía Local recibiu un aviso do 112 sobre un posible furto e desprazouse ao local.
Segundo a información facilitada aos axentes, unha muller abandonara o comercio sen pagar unha chaqueta valorada en 169,95 euros. A prenda foi recuperada e devolta ao establecemento, polo que non se produciu perda patrimonial polo artigo.
A muller foi identificada e instruíronse dilixencias para xuízo rápido sen detido, remitidas ao Corpo Nacional de Policía para continuar o procedemento.