A Dirección Xeral de Patrimonio Cultural autorizou as primeiras actuacións para analizar e recuperar a histórica pintada «Adiante semanario», situada na fachada oeste do Mosteiro de San Salvador de Celanova.
A resolución, asinada o 23 de xuño, permite iniciar os estudos de danos, a diagnose conservativa e o deseño da súa futura musealización.
Patrimonio autoriza a recuperación da pintada «Adiante semanario»
A pintada, con máis de 93 anos de historia, está considerada un símbolo do galeguismo e vinculada a figuras como Celso Emilio Ferreiro e Xosé Velo. O mosteiro está declarado Ben de Interese Cultural (BIC).
O expediente foi impulsado pola produtora Vaca Net TV SLU, responsable da alteración sufrida pola pintada o pasado 7 de marzo, baixo a dirección técnica do arqueólogo Eduardo Breogán Nieto Muñiz.
Patrimonio establece que os estudos deberán ser realizados por especialistas en conservación e restauración. Unha vez completadas estas fases, o proxecto terá que recibir unha nova autorización antes de executar as obras físicas de restauración.
O Comité de Memoria Histórica da Comarca de Celanova reclama tamén que «Adiante semanario» sexa catalogada como elemento patrimonial propio, xa que actualmente non figura nun inventario ou catálogo formal.