Os concelleiros non adscritos de Barbadás Manuel Ángel Fernández e José Luis Dorribo levarán ao Pleno tres propostas para mellorar as infraestruturas culturais e a xestión municipal.
As tres mocións que presentarán no próximo Pleno inclúen un auditorio, cambiar o horario das sesións e actualizar o inventario de bens.
Os non adscritos de Barbadás reclaman un auditorio municipal
A principal iniciativa reclama a construción dun auditorio municipal adaptado ao crecemento poboacional e á actividade cultural de Barbadás. Os edís consideran insuficientes as instalacións actuais e propoñen estudar a súa localización, reservar fondos para redactar o proxecto e solicitar financiamento á Xunta e á Deputación de Ourense.
Ademais, critican que concellos limítrofes con menor poboación reciban máis investimentos en infraestruturas educativas, deportivas, asistenciais e de mobilidade.
As outras dúas mocións propoñen trasladar os plenos ordinarios á mañá, para evitar sesións que se prolongan ata a medianoite, e crear un Inventario Xeral de Bens e Dereitos actualizado, con seguimento trimestral e publicación no Portal de Transparencia.
