A representación da obra A lingua das bolboretas supón o regreso, unha vez máis, do grupo Sarabela Teatro ó Auditorio de Ourense.
O teatro regresa ó Auditorio de Ourense da man dunha das compañías máis importantes da escena galega. Sarabela Teatro representará este venres, 19 de novembro ás 20:30h, a obra A lingua das bolboretas.
A lingua das bolboretas en Ourense
Baseada no libro de Manuel Rivas, a versión realizada por Fernando Dacosta contará cun importante elenco de actrices e actores. Sobre o escenario estarán Elena Seijo, Fina Calleja, Sabela Gago, Fernando Dacosta, César Goldi, Fran Lareu e Josiño Porto. A obra trata da relación entre un mestre e o seu alumno. Unha relación de admiración e aprendizaxe do neno cara o seu mestre truncada polo inicio da guerra civil. Unha loita entre as liberdades e o medo á represión.
Esta obra permite á compañía Sarabela Teatro festexar o seu 40 aniversario. A calidade da representación de A lingua das bolboretas ven avalada polos premios acadados. Nos XXV Premios de Teatro María Casares conseguiu:
- Mellor espectáculo
- Mellor adaptación (Fernando Dacosta e Gonçalo Guerreiro)
- Actor secundario (Fran Lareu)
- Mellor Director (Gonçalo Guerreiro)
