A Andaina Solidaria da Festa do Pan de Cea volverá unir deporte, saúde e solidariedade nunha iniciativa que destinará a súa recadación á Asociación Española Contra o Cancro en Ourense.
Esta actividade foi presentada oficialmente no Concello de San Cristovo de Cea coa participación da xerente da entidade, Judit Vega, quen destacou o valor deste tipo de propostas para promover hábitos de vida saudables e reforzar a concienciación social na loita contra a enfermidade.
A Andaina Solidaria da Festa do Pan de Cea recadará fondos contra o cancro
Durante o acto, a representante da asociación expresou o apoio da entidade a unha iniciativa que combina a práctica deportiva coa colaboración cidadá. A recadación permitirá contribuír ao financiamento de programas de prevención, investigación e acompañamento ás persoas afectadas polo cancro e ás súas familias.
A andaina contará con dous percorridos adaptados a diferentes niveis de esixencia física. O itinerario longo terá unha distancia de 22 quilómetros e partirá ás 9:00h. Pola súa parte, o percorrido curto será de 11 quilómetros e dará comezo ás 10:00h. Ambas saídas realizaranse desde a Praza Maior de Cea.
A participación require unha inscrición de 10 euros, cantidade que se destinará á Asociación Española Contra o Cancro. As persoas interesadas deberán realizar o ingreso na conta habilitada pola organización e remitir posteriormente o xustificante de pagamento.
O prazo para formalizar a inscrición permanecerá aberto ata o 25 de xuño. Ademais, a organización informa de que a recollida de dorsais se efectuará media hora antes da saída e que todas as persoas participantes recibirán un agasallo conmemorativo.
Desde a Asociación Española Contra o Cancro subliñan a importancia de iniciativas solidarias deste tipo, que favorecen a implicación da cidadanía. Estas contribúen a avanzar no obxectivo común de combater a enfermidade mediante a prevención, a investigación e o apoio ás persoas pacientes.