O Tribunal de Instancia de Ourense (Sección de Instrución número 2) decretou o sobresemento provisional e o arquivo das dilixencias abertas contra o alcalde de Ourense, Gonzalo Pérez Jácome, o Concello, a Deputación e dous expresidentes do Club Ourense Baloncesto (COB).
O sobresemento chega tras non apreciar indicios dos delitos denunciados pola empresa Will & Laws Gestión Internacional de Herencias S.L.
A xustiza arquiva a querela contra Jácome e o COB
A mercantil presentara unha querela por presunta estafa, falsidade documental, administración desleal e apropiación indebida en relación coa súa entrada na xestión do club en 2021.
Esta empresa sostía que se lle prometera o 51 % das accións da sociedade deportiva a cambio dos investimentos realizados. A empresa cifraba estes investimentos en arredor de medio millón de euros.
Porén, a maxistrada conclúe que non quedou acreditada a existencia dun engano previo. Lembra que o contrato asinado establecía que a empresa debía participar na ampliación de capital “aboando o prezo que se fixe”, unha condición distinta á compensación automática das achegas realizadas.
O auto tamén descarta os delitos de falsidade documental, administración desleal e apropiación indebida. Constata que os fondos achegados figuran rexistrados na contabilidade do club como pasivo financeiro. Ademais, sinala que as discrepancias entre as partes deben resolverse pola vía civil.