A Asociación galega de persoas con enfermidades oncohematolóxicas (Asotrame) impulsará novas accións de sensibilización sobre a doazón de medula ósea en Ourense grazas ao apoio da Deputación de Ourense.
A entidade recibiu por primeira vez unha subvención provincial de 4.766 euros para desenvolver durante 2026 o programa «Reflexos de vida».
Asotrame reforza a doazón de medula en Ourense
A iniciativa forma parte da convocatoria de axudas da Deputación destinada a entidades sen ánimo de lucro que desenvolven proxectos de carácter social. O obxectivo é aumentar o número de persoas de entre 18 e 40 anos inscritas no Rexistro Español de Doantes de Medula Ósea.
O programa incluirá charlas dirixidas ao público adulto e ao alumnado de centros educativos. Nestas actividades participarán superviventes de enfermidades oncohematolóxicas como leucemias, linfomas, mielomas múltiples ou síndromes mielodisplásicos. Os seus testemuños servirán para explicar a importancia da doazón de células nai do sangue como oportunidade para salvar vidas.
Ademais, Asotrame organizará mesas informativas en centros hospitalarios da provincia para achegar información á cidadanía. A asociación xa desenvolve desde o pasado mes o programa de voluntariado «Apoio entre iguais» no Hospital Universitario de Ourense.
A campaña completarase con accións de difusión nas redes sociais para fomentar a doazón de medula e contribuír a que ningún paciente que precise un transplante quede sen un doante compatible.
O impulso á doazón de medula constitúe un dos principais eixos de actuación de Asotrame, xunto coa atención ás persoas con cancro hematolóxico e ás súas familias e o apoio á investigación sanitaria.