O Concello de Ourense abrirá mañá, xoves 30 de abril, o prazo para solicitar as axudas para libros e material escolar e comedor de cara ao curso 2026/2027.
A convocatoria, xestionada pola Concellería de Asuntos Sociais, permanecerá aberta ata o 21 de maio, incluído.
Prazo aberto en Ourense para axudas escolares 2026/27
As solicitudes poderán presentarse tanto de forma presencial como a través da sede electrónica municipal. Estas axudas están destinadas a familias en situación de desvantaxe social e con menor capacidade económica, con menores escolarizados en centros públicos ou concertados da cidade.
Para optar ás subvencións, as unidades familiares deberán estar empadroadas en Ourense cun mínimo de tres meses de antigüidade e non superar os 4.000 euros de renda per cápita anual.
O programa conta cun orzamento total de 325.000 euros, dos que 25.000 euros se destinan a libros e material escolar, e 300.000 euros a comedores escolares.
No caso das axudas para material escolar, poderán solicitalas familias con alumnado matriculado en 4º, 5º ou 6º curso de Educación Infantil, cunha contía de 110 euros por neno ou nena. Pola súa banda, as axudas de comedor están dirixidas a estudantes de Infantil, Primaria e ESO con praza activa, cunha achega de ata 90 euros mensuais por persoa.