Barbadás celebrará o vindeiro 4 de xullo a cuarta edición do paseo literario “O Piñor de Carmen Martín Gaite”. Esta iniciativa compleméntase coa inauguración da exposición fotográfica “As palabras postas en fila: O álbum de infancia de Carmiña en Piñor”.
Ambas propostas teñen como obxectivo poñer en valor a relación da recoñecida escritora coa parroquia de San Lourenzo de Piñor e divulgar o patrimonio cultural e literario do municipio.
Barbadás celebra o IV Paseo Literario de Carmen Martín Gaite e inaugura unha exposición fotográfica
As actividades contan coa mentoría de David González Couso, investigador e estudoso da vida e obra de Carmen Martín Gaite.
O paseo literario comezará ás 9:45 h coa saída desde o Centro Social de San Lourenzo de Piñor. Durante a xornada presentarase oficialmente a ruta “O Piñor de Carmen Martín Gaite”. Este itinerario permite descubrir os espazos que influíron na vida e na creación literaria da autora, reforzando a conexión entre a súa obra e a contorna na que pasou parte da súa infancia.
Coincidindo coa celebración desta actividade, abrirase ao público a exposición “As palabras postas en fila: O álbum de infancia de Carmiña en Piñor”. Esta reúne fotografías, documentos e lembranzas vinculadas aos primeiros anos da escritora na localidade. A mostra poderá visitarse no Centro Social de San Lourenzo de Piñor desde o propio 4 de xullo.
Desde o Concello destacan que esta exposición ofrece unha nova oportunidade para achegarse á dimensión máis persoal de Carmen Martín Gaite. Ao mesmo tempo, contribúe a preservar e difundir a memoria dunha autora fundamental das letras españolas.
Con esta cuarta edición, o paseo literario consolídase como unha das propostas culturais de referencia en Barbadás, ao combinar literatura, historia, fotografía e patrimonio nunha iniciativa que reforza a identidade cultural do municipio e recupera a pegada que a escritora deixou en Piñor.