O concurso «Todos á San Martiño-Veolia» recoñeceu os 20 mellores debuxos presentados por alumnado de nove centros educativos da cidade.
O Auditorio de Ourense acolleu a entrega de premios desta primeira edición que busca achegar a carreira popular ás novas xeracións.
Vinte debuxos escolares darán cor á próxima San Martiño
O certame recibiu 220 traballos de escolares de 5º e 6º de Primaria e 1º e 2º da ESO.
Os 20 debuxos seleccionados terán presenza na próxima edición da proba, xa que servirán para sinalizar os puntos quilométricos cada 500 metros ao longo do percorrido. Os autores recibiron equipamento deportivo conmemorativo e os seus centros educativos, vales para adquirir material deportivo.
O alcalde, Gonzalo Pérez Jácome, participou na gala xunto aos concelleiros de Deportes e Educación, Aníbal Pereira e Tamara Silva, e á xerente de Veolia en Ourense, Paula Díaz. Durante o acto, destacou o protagonismo da infancia na carreira: «Vós facedes da San Martiño a máis grande de Galicia».
A xornada incluíu tamén un encontro motivacional con referentes do atletismo, como Álex Fernández, Esther Navarrete e Alice Finot. Tamén estivo Julio Fernández Pérez, fundador da San Martiño, que repasou as orixes da proba e a súa vinculación coa cidade.
Esta iniciativa pretende reforzar a relación entre a carreira e os centros educativos, así como transmitir os valores do deporte entre os máis novos.
A 49ª edición da Carreira Popular San Martiño celebrarase o domingo 9 de novembro, cun novo percorrido, un incremento dos premios económicos e unha maior implicación dos centros educativos. As inscricións continúan abertas.