As explicacións sobre a situación de impagos no Concello de Ourense centraron a xunta de portavoces convocada esta mañá polo alcalde, Gonzalo Pérez Jácome.
Este trasladou aos grupos municipais que a paralización de numerosos pagamentos non responde á falta de liquidez, senón a problemas na tramitación administrativa das facturas.
Jácome atribúe os impagos municipais á falta de fiscalización de facturas
Segundo explicou o rexedor, o Concello dispón actualmente de 75 millóns de euros de saldo dispoñible. Pérez Jácome considera suficiente esta cantidade para afrontar todas as obrigas pendentes cos provedores.
Porén, denunciou que moitas facturas non poden completar o seu percorrido administrativo porque o departamento de Intervención non realiza a correspondente fiscalización.
Jácome sinalou que esta circunstancia afecta a facturas tramitadas de forma ordinaria, avaladas polos distintos departamentos municipais e correspondentes a servizos prestados ao Concello. A ausencia dunha fiscalización, xa sexa favorable ou desfavorable, impide que os expedientes continúen a súa tramitación e que os pagamentos poidan executarse.
Ante esta situación, o alcalde avanzou que o Concello está a trasladar o caso á Xunta de Galicia, administración competente para avaliar as actuacións do departamento de Intervención.
Ademais, informou de que os provedores afectados están a ser asesorados sobre os mecanismos legais dos que dispoñen para reclamar o cobro das cantidades pendentes. Entre eles, mencionou a posibilidade de acudir aos tribunais para solicitar medidas cautelarísimas ao abeiro do artigo 199 da Lei de Contratos do Sector Público.
O rexedor defendeu que a súa responsabilidade é garantir que os provedores cobren polos servizos prestados e asegurou que o goberno municipal está a estudar todas as vías legais dispoñibles para desbloquear a situación.
Por último, Jácome anunciou que tamén valora analizar posibles accións para protexer os intereses económicos do Concello fronte ás consecuencias derivadas destes atrasos, como o pagamento de intereses de demora ou eventuais custas xudiciais.