Os orzamentos do Concello de Ourense para 2026 recibiron este martes, 23 de xuño, a aprobación inicial, despois de que rematase o prazo legal dun mes sen que os grupos da oposición, PP, PSdeG-PSOE e BNG, presentasen unha moción de censura cun candidato alternativo á Alcaldía.
Este documento económico, que marca a planificación municipal para o vindeiro exercicio, continuará agora coa súa tramitación administrativa.
O orzamento do Concello de Ourense para 2026 inicia a súa tramitación tras a aprobación inicial
O goberno local remitirá de inmediato o acordo para a súa publicación no Boletín Oficial da Provincia (BOP) de Ourense. Este é o paso previo á apertura do período de exposición pública.
Durante 15 días hábiles, as persoas interesadas poderán consultar o expediente e presentar as reclamacións que consideren oportunas. No caso de que non se rexistren alegacións, as contas quedarán aprobadas definitivamente de forma automática. Pola contra, se existen reclamacións, o expediente deberá regresar ao pleno municipal para a súa resolución e posterior aprobación definitiva.
O Orzamento Xeral do Concello de Ourense para 2026 alcanza os 127.800.000 euros, unha contía que inclúe tanto as contas do propio Concello como as do Consello Municipal de Deportes, ademais das bases de execución e dos anexos de persoal.
