Membros do BNG de Celanova piden protección para a pintada «Adiante Semanario» que figura nunha das fachadas do Mosteiro de Celanova.
Esta pintada data de 1933 e foi realizada por membros das Mocedades Galeguistas das que formaban parte Celso Emilio Ferreiro ou Xosé Velo.
Piden protección para a pintada «Adiante Semanario»
Desde o BNG recordan que en plenos municipais xa se debateu sobre este asunto a instancia do Comité de Memoria Histórica da Comarca de Celanova. A pesar do apoio da totalidade do pleno á protección desta pintada, continúa o seu deterioro.
Leopoldo Rodríguez, voceiro nacionalista indica que «é o exemplo máis evidente da incompetencia deste goberno municipal, que leva semanas pintando muros e valados para presentar unha cara bonita nas eleccións, mais é incapaz de protexer un elemento histórico que mesmo fai parte da promoción que fai a Fundación Curros e se atopa na fachada dun BIC, o Mosteiro de Celanova, que sufre tamén constantes agresións coa colocación de cables ou uso indiscriminado do claustro barroco para actividades que deberían ter outros enclaves».