O Grupo Municipal Socialista de Ourense informou da presentación de catro reclamacións ao expediente dos Orzamentos municipais para corrixir, segundo sostén, deficiencias xurídicas e procedementais antes da súa aprobación definitiva.
A voceira socialista, Natalia González Benéitez, asegurou que a cidade «necesita un Orzamento que poida executarse, que dea seguridade xurídica e que responda ás necesidades reais«.
O PSdeG reclama cambios nos Orzamentos de Ourense
O PSdeG afirma que as reclamacións afectan á falta do informe da Intervención Xeral, á tramitación do capítulo de persoal, ao Plan Económico-Financeiro e á reiteración das propostas presentadas na fase inicial.
Os socialistas consideran que o Goberno municipal aínda pode mellorar o expediente e incorporar medidas relacionadas coa vivenda, o comercio local, os servizos sociais, a saúde mental, os barrios e o deporte base.
O grupo conclúe facendo un chamamento á responsabilidade institucional para aprobar uns Orzamentos que, segundo defende, sexan sólidos desde o punto de vista xurídico e útiles para a cidade.
