Os grupos municipais do PSOE e o BNG estudarán as propostas do alcalde de Ourense para suprimir a ORA e facilitar a entrada de novos inversores no COB.
O Alcalde de Ourense mantivo unha reunión no concello cos portavoces dos grupos políticos para avanzar as súas intencións.
PSOE e BNG estudarán as propostas do Alcalde
Despois desta reunión, desde o PSdeG-PSOE e o BNG anuncian que meditarán a súa resposta analizando os pros e contras de cada unha das opcións. Luís Seara manifestouse contrariado polas formas da convocatoria e a ausencia de información previa.
«Convocousenos onte por whatsApp a unha reunión pero sen coñecemento previo da orde do día e dos asuntos dos que se ía falar. Fomos a cegas, o cal xa indica o grao de disparate no que está instalado este Concello».
Desde o PSdeG-PSOE instan a analizar o impacto social e económico que tería esta medida de suprimir a ORA. Para o BNG, a supresión da ORA «é unha cuestión importante que ten efectos sobre a mobilidade» e que avaliarán no partido.
Ante a chegada de novos accionistas no Club Ourense Baloncesto, Natalia González, mostrou a necesidade de «blindar e defender a área social». Ó mesmo tempo, sumábase «ó chamamento á participación do tecido empresarial para garantir a autonomía e supervivencia do COB, dentro do proxecto conxunto que todos e todas aspiramos a ter para Ourense».
O BNG indica que «se do que se trata é de desprenderse do paquete accionarial, haberá que facelo tamén na outra SAD na que o Concello tamén ten accións como é o Ourense CF». Seara solicita tempo para «avaliar antes de fixar posición».
Natalia González Benéitez, portavoz socialista no concello, non quixo deixar pasar a ocasión para «facer un recoñecemento expreso aos responsables da área social do COB polo seu inmenso traballo e compromiso». González destacou que «da man de outras asociacións e colectivos da cidade conseguiron que fora unha das mellores da Liga LEB Ouro este ano. Fixeron medrar notablemente a asistencia aos partidos do club, chegando nalgún caso arredor de 5.000 persoas esta tempada».