O comercio local e a representación equilibrada de mulleres e homes nos actos institucionais centran dúas das mocións que o Grupo Municipal Socialista defenderá no pleno ordinario deste venres en Ourense.
A formación asegura que ambas iniciativas buscan avanzar cara a un modelo de cidade con máis oportunidades económicas e cunha maior igualdade na esfera pública.
O PSOE leva ao pleno propostas para impulsar o comercio local e a igualdade institucional
A concelleira socialista María Fernández advertiu da perda progresiva de actividade comercial na cidade e criticou a falta de medidas estruturais por parte do goberno municipal para facer fronte ao peche continuado de negocios e ao incremento dos locais baleiros.
Segundo trasladou a edil, o PSOE considera necesario desenvolver unha planificación específica que aposte polo comercio de proximidade como motor económico e social. A proposta inclúe a posta en marcha dun plan de dinamización para o casco histórico e os barrios, co obxectivo de fortalecer a actividade económica, crear emprego e contribuír á vitalidade dos espazos urbanos.
A segunda moción céntrase na igualdade de representación nos actos institucionais. Fernández sostén que, malia os avances acadados nos últimos anos, segue existindo unha infrarrepresentación das mulleres nos espazos de visibilidade pública organizados polas administracións.
Neste sentido, o Grupo Socialista propón incorporar criterios de representación equilibrada na organización de actos públicos e na composición das mesas institucionais. O obxectivo é evitar imaxes nas que a presenza masculina sexa maioritaria. A formación defende que a representación institucional debe reflectir a diversidade da sociedade e contribuír á creación de referentes igualitarios.