As sirenas da presa de Velle volverán soar o vindeiro 25 de xuño nunha proba anual do Plan de Emerxencia destinada a comprobar o funcionamento do sistema de aviso á poboación e a familiarizar á cidadanía cos sinais de alerta.
O simulacro desenvolverase o xoves 25 de xuño arredor das 13:00 horas.
As sirenas da presa de Velle soarán o 25 de xuño nun simulacro de emerxencia
Durante a proba activaranse as sirenas instaladas en distintos puntos da cidade de Ourense ao longo dos leitos dos ríos Miño, Barbaña e Lonia. Antes da emisión do sinal acústico, reproducirase unha mensaxe gravada informando de que se trata dun exercicio e non dunha situación real de emerxencia.
Aínda que os encoros son infraestruturas seguras, sometidas a estritos sistemas de control, vixilancia e seguimento, a normativa contempla a existencia de plans específicos para facer fronte a posibles incidentes ou avarías graves que poidan afectar á poboación, aos bens materiais ou ao medio ambiente.
O Plan de Emerxencia da Presa de Velle establece diferentes niveis de actuación en función da gravidade da incidencia detectada. Para cada escenario defínense os procedementos de intervención dos servizos de emerxencia, os mecanismos de aviso á cidadanía e, se fose necesario, as medidas de protección e evacuación cara a puntos seguros.
Segundo explican os responsables do dispositivo, a realización desta proba anual persegue un dobre obxectivo. Por un lado, verificar o correcto funcionamento dos sistemas de alerta. Por outro, contribuír a que a poboación identifique os sinais acústicos que se empregarían nunha situación real de emerxencia.