A Consellería do Medio Rural informou este martes ás 20.30 horas da situación dos incendios forestais en Galicia, cunha atención especial á provincia de Ourense, onde segue decretada a Situación 2 en todo o territorio.
Esta medida permite reforzar medios, ampliar quendas de traballo e axilizar a coordinación con outras administracións, incluída a Unidade Militar de Emerxencias (UME).
Última hora dos incendios en Ourense: máis de 70.000 hectáreas arrasadas
Lumes activos
O foco máis preocupante continúa sendo o que arrasa os montes de Chandrexa de Queixa, Vilariño de Conso e municipios limítrofes, con arredor de 18.000 hectáreas afectadas. Para a súa extinción mobilizáronse centos de efectivos e medios aéreos.
Outro dos grandes incendios permanece activo entre Oímbra e Xinzo de Limia, con máis de 15.000 hectáreas queimadas e propagación a concellos como Monterrei, Verín, Cualedro, Laza ou Baltar.
Na Mezquita segue descontrolado o lume que se iniciou o martes 12 en Esculqueira, que xa alcanzou 10.000 hectáreas e cruzou á provincia de Zamora, con apoio tamén de brigadas portuguesas.
En Larouco-Seadur, o incendio que comezou o mércores 13 segue activo e é un dos máis extensos, con máis de 20.000 hectáreas arrasadas en concellos da comarca de Valdeorras e ata en Quiroga.
Tamén continúan activos outros focos:
- Vilardevós-Vilar de Cervos, con 900 hectáreas.
- Vilardevós-Moialde, con 500 hectáreas.
- Carballeda de Avia e Beade, unidos nun só incendio que afecta xa 4.000 hectáreas.
- A Veiga-A Ponte, con máis de 20 hectáreas, tras entrar dende Castela e León.
Incendios estabilizados
A boa noticia chega con varios lumes que pasaron a situación de estabilizados, entre eles:
- Maceda, con 3.500 hectáreas queimadas.
- Vilardevós-Fumaces e A Trepa, cunhas 100 hectáreas.
- Riós-Trasestrada, con 20 hectáreas.
- Montederramo-Paredes, con 120 hectáreas.
Incendio controlado
En San Cibrao das Viñas, o lume declarado o sábado quedou controlado tras calcinar máis de 60 hectáreas.
Balance provisional
En total, segundo datos provisionais, os lumes en Ourense superan xa as 70.000 hectáreas afectadas, o que converte esta vaga de incendios nunha das máis graves das últimas décadas en Galicia.