Noticias

Sandiás reúne os amantes da ornitoloxía nas XX Xornadas «20 na Limia»

Sandiás acolleu os días 13 e 14 de novembro as XX Xornadas de Ornitoloxía «20 na Limia», un encontro que reuniu ornitólogos e naturalistas galegos para divulgar a riqueza das aves e o patrimonio natural da comarca.

A actividade, promovida polo Xeodestino A Limia coa colaboración do Concello de Sandiás, desenvolveuse na Casa da Cultura e incluíu relatorios e espazos de intercambio de experiencias sobre a biodiversidade e o turismo ornitolóxico.

Sandiás reúne os amantes da ornitoloxía nas XX Xornadas «20 na Limia»

O programa comezou o venres coa benvida do alcalde, Felipe Traveso, e o relatorio de Diego Rodríguez, titulado «Recursos e valores ornitolóxicos da Limia». Posteriormente, celebrouse un encontro de ornitólogos e naturalistas galegos para compartir coñecementos e analizar posibles actuacións destinadas a impulsar o turismo vinculado á observación de aves.

Sandiás reúne os amantes da ornitoloxía nas XX Xornadas "20 na Limia"
Foto: Concello de Sandiás.

As xornadas remataron cunha cea de confraternidade. Pola súa banda, as saídas de campo polas Areeiras de Sandiás e a Veiga de Gomareite trasladáronse ao domingo 22 de novembro debido ás condicións meteorolóxicas.

O encontro puxo de manifesto a importancia dos humidais da Limia como hábitats fundamentais para numerosas especies e a necesidade de conservar estes ecosistemas. O Xeodestino A Limia aposta así pola divulgación ambiental e pola valorización dos recursos naturais como elementos de identidade e atractivo turístico da comarca.

Botón volver arriba