Preto de vinte alumnos do Programa Universitario para Maiores visitaron a Casa da Lagoa para coñecer a evolución da paisaxe, a biodiversidade e o patrimonio cultural da Limia.
A Universidade de Vigo achegou o seu alumnado á historia e á memoria da Lagoa de Antela cunha visita didáctica á Casa da Lagoa, celebrada o martes 27 de outubro.
A Universidade de Vigo afonda na historia da Lagoa de Antela
Preto de vinte participantes na materia Diversidade paisaxística e cultural, acompañados pola profesora Ana Cebreiros, coñeceron a evolución deste emblemático humidal da Limia.
A actividade comezou coa presentación dun mapa de Galicia elaborado por Domingo Fontán, vinculado ao xeógrafo Ramón Otero Pedrayo. Despois, o alumnado visionou un audiovisual sobre a lagoa e analizou a súa historia, os intentos de desecación, as lendas e as actividades económicas tradicionais que desapareceron coa transformación do territorio.
A visita tamén abordou os tres grandes procesos que modificaron a conca da Limia:
- a súa evolución natural,
- a desecación da lagoa durante o franquismo e
- a concentración parcelaria.
Ademais, presentáronse iniciativas de restauración ambiental como o Humidal Antonio Vilariño, na Veiga de Vilaseca, e o proxecto da Veiga de Gomareite, destacados pola súa biodiversidade.
Desde a Casa da Lagoa valoraron positivamente esta segunda visita do alumnado universitario e o interese amosado durante a xornada. A entidade deixou abertas as portas a futuros encontros para continuar divulgando o patrimonio natural, histórico e etnográfico da Limia.