Ourense acollerá do 5 ao 8 de decembro as II Xornadas Formativas para o Teatro Amador Galego, unha iniciativa organizada pola Federación Galega de Teatro Afeccionado (FETEAGAL).
Este evento conta co apoio da Xunta de Galicia e da Deputación de Ourense, e coa colaboración de El Liceo de Ourense.
II Xornadas Formativas de Teatro Amador en Ourense
Baixo o lema “Da palabra á acción”, o encontro ofrecerá catro días de aprendizaxe intensiva dirixidos a persoas vinculadas ao teatro afeccionado galego.
Nesta edición, os formadores serán dous nomes de referencia no panorama escénico galego: o director Tito Asorey e a actriz Melania Cruz. Ambos compartirán a súa experiencia profesional nun espazo de traballo práctico e colaborativo.
As xornadas teñen como obxectivo desenvolver técnicas de interpretación a partir do texto, potenciar a expresión oral e a escoita activa, comprender e optimizar os mecanismos da voz, así como ler e analizar textos dramáticos en termos de acción. Ademais, tamén se abordará a diferenza entre a linguaxe escrita e oral aplicada á interpretación.
O prazo de inscrición con aloxamento incluído está aberto ata o 31 de outubro. Se aínda quedasen prazas dispoñibles, abrirase unha nova quenda en novembro. Toda a información e o proceso de inscrición poden consultarse a través do código QR dispoñible no cartel do evento.
Estas II Xornadas Formativas consolidan a súa aposta pola profesionalización e o intercambio de coñecementos dentro do teatro amador galego, ofrecendo un espazo único para seguir medrando artisticamente e fortalecer a comunidade escénica do país.